Мэдээлэл нийтлэсэн: Сангийн яам
Нийтлэсэн огноо: 2020 оны 11 сарын 25
Дэмчигийн Моломжамц
(1920-2006)
Төр нийгмийн зүтгэлтэн, Монгол Улсын гавьяат эдийн засагч, Сангийн сайд агсан Дэмчигийн Моломжамцын мэндэлсний 100 жилийн ой энэ өдөр тохиож байна. Тэрээр Сангийн яамны 14 дэх сайд бөгөөд 1948-1957 оны хооронд Сангийн явдлын яамны сайдаар ажиллаж байжээ.
Д.Моломжамц нь 1920 онд Цэцэнхан аймгийн Цэцэн вангийн хошуу, одоогийн Дундговь аймгийн Баянжаргалан сумын нутагт төржээ. Бага насандаа хийдэд шавилан сууж, бурхны ном сурахын зэрэгцээ монгол бичиг заалгаж сурчээ. 1940 онд Санхүүгийн сургуулийг, 1946 онд ЗХУ-ын /хуучин нэрээр/ Эрхүү хотын Санхүү, эдийн засгийн дээд сургуулийг тус тус төгсөж, санхүү-эдийн засгийн дээд боловсрол эзэмшсэн байна.
Тэрбээр:
1946-1948 онд Сангийн яамны сайдын үүрэг гүйцэтгэгч, жинхэнэ орлогч сайд;
1948-1957 онд Сангийн явдлын яамны сайд;
1957-1959 онд МАХН-ын Улс төрийн товчооны орлогч гишүүн;
1957-1965 онд Сайд нарын Зөвлөлийн даргын орлогч, нэгдүгээр орлогчоор ажиллахын зэрэгцээ Улсын төлөвлөгөөний комиссын дарга, Сайд нарын зөвлөлийн дэргэдэх Эдийн засгийн хамтын ажиллагааны хорооны дарга бөгөөд Эдийн засгийн харилцан туслалцах зөвлөл /ЭЗХТЗ/-д суух БНМАУ-ын Байнгын хорооны төлөөлөгч зэрэг албан тушаалыг хавсран гүйцэтгэж байв.
1964-1989 онд МАХН-ын Улс төрийн товчооны орлогч гишүүн, Төв хорооны нарийн бичгийн даргаар тус тус ажиллаж байжээ.
Түүнийг Санхүү-банкны тэргүүний ажилтан цол, тэмдгээр шагнаж, Сангийн яамны “Хүндэт дэвтэр”-т алдар нэрийг нь мөнхжүүлсэн.
Д.Моломцамцын хөдөлмөрийг төр, засаг өндрөөр үнэлэн Хөдөлмөрийн гавьяаны улаан тугийн одонгоор 2 удаа, Сүхбаатарын одонгоор 3 удаа шагнаж, 2005 онд Монгол Улсын гавьяат эдийн засагч цол хүртээжээ.