Мэдээлэл нийтлэсэн: Санхүүгийн бодлогын газар
Нийтлэсэн огноо: 2025 оны 09 сарын 03
Засгийн газрын өрийн удирдлагын 2023-2025 оны стратегийн баримт бичигт Засгийн газрын дотоод үнэт цаас (ЗГДҮЦ)-ны зах зээлийн хөгжлийг дэмжиж, үнэт цаасны арилжааг тогтмолжуулах зорилт тусгагдсан. Үүний дагуу Сангийн сайдын 2025 оны 51 дүгээр тушаалаар 2025 оны 04 дүгээр сарын 16-ны өдрөөс эхлэн Монголын хөрөнгийн биржийн цахим арилжааны систем (www.bond.mse.mn)-ээр дамжуулан 2 долоо хоног тутам олон нийтэд нээлттэй хэлбэрээр ЗГДҮЦ-ны арилжаа явагдаж байна.
Сангийн яамны зүгээс ЗГДҮЦ-ны хөрөнгө оруулагчдыг мэдээллээр хангах, өнгөрсөн арилжааны үр дүн болон ирэх улирлын арилжааны хуваарийг танилцуулах, арилжаатай холбоотой бусад асуудлаар санал солилцох зорилгоор улирал бүр тогтмол уулзалт зохион байгуулж байгаа бөгөөд ээлжит уулзалтыг 2025 оны 09 сарын 02-ны өдөр зохион байгууллаа.
Энэхүү уулзалтаар Засгийн газрын дотоод үнэт цаасны 2025 оны II, III улирлын арилжааны үр дүн, IV улирлын арилжааны хуваарь, Монгол Улсын 2026 оны төсвийн төсөлд тусгагдсан үнэт цаасны арилжааны төлөвлөгөөний талаар танилцуулж, санал солилцлоо.
Засгийн газрын дотоод үнэт цаасны анхдагч зах зээлийн арилжаатай холбоотой дэлгэрэнгүй мэдээллийг Монгол Улсын Сангийн яамны www.mof.gov.mn болон Монголын хөрөнгийн биржийн www.mse.mn системээр тогтмол авах боломжтой.
